Kya Nabi ﷺ Bashar The?

Allah, uske rasool ﷺ aur Sahaba (RA) ki gawahi se maloom hota hai ki Nabi-e-Kareem ﷺ aur Aap ﷺ se pahle tamam ambiya bashar (insan) the aur yahi cheez kuffar ke inkar-e-nubuwwat ki ek badi wajah bani. Wo samajhte the ki ek bashar kaise risalat ke azeem mansab par faaiz ho sakta hai?

Humare yahan bhi ek tabqa Nabi ﷺ ki tazeem me ghuluw karte hue ye samajhta hai ki Aap ﷺ ko agar Khalis insan maan liya jaye to Nabi ﷺ ki shan me kami aa jayegi. Isliye wo ye samajhta hai ki Nabi ﷺ ko noor se paida kiya gaya hai. Agarche, isme koi shak nahin ki Nabi ﷺ noor-e-hidayat hain jinke zariye duniya Kufr aur Shirk ke andheron se bahar ayi. Yani ye noor hona unki sifat hai, lekin iska koi suboot nahin ki Aap ﷺ ki takhleeq noor se hui hai.

Is mazmoon me hum dekhenge ki Kafiron ne har daur me Nabiyon ki bashariyat ka inkar kiya hai. Qur’an na sirf pichhle sare nabiyon, balki khud Rasoolullah ﷺ ko bashar manta hai. Isi tarah Sahaba (RA) me is bare me kabhi ikhtilaf nahin hua ki Nabi ﷺ bashar he the na ki Noor, ya Noor aur bashar dono.

Nabi ﷺ ki takhleeq noor se hone ke bare me pesh ki jane wali ahadees ka jaayza lene ke liye is mazmoon ko padhiye.

Har Daur Me Kuffar Ne Nabiyon Ki Bashariyat Ka Inkar Kiya

① Qaum-e-Nuh (AS) ki nubuwwat ka inkar karte hue kaha:
Hum tujhe bas apne hi jaisa bashar samajhte hain. (Surah Hud: 27)

Imam Ibne Jarir Tabari (rh) (d 310h) farmate hain: “Unhone apne nabi Nuh (AS) ki nubuwwat ka inkar kiya (aur kaha): “Aye Nuh! Hum tujhe apne jaisa bashar hi dekhte hain.” Murad ye thi ke Nuh (AS) takhliq, shakl-o-soorat aur jins me unhi ki tarah ke ek insan hain. Kuffar is bat ko taslim nahin karte the ki Allah Ta’ala apni makhlooq ki taraf jins bashar me se Rasool bheje”. (Tafseer Tabari 12/36)

② Firaun aur uske hawariyon ne Musa (AS) aur Haroon (AS) ke bare me kaha:
Kya hum apne jaise 2 basharon par iman layen? (Surah-al-Mominoon: 47)

③ Pichhle tamam ambiya ki ummato ne unse kaha:
Yaqeenan tum humare hi jaise bashar ho. (Surah Ibrahim: 10)

④ Allah Ta’ala ne unke is nazariye ki tardeed farmai:
Unke rasoolon ne unse kaha ki hum tumhare hi jaise bashar hain. (Surah Ibrahim: 11)

Bilkul yahi soorat-e-hal Rasoolullah ﷺ ke sath pesh ayi. Kuffar-e-Makkah kahte the ki humare hi jaisa ek bashar nabi kaise? Qur’an-e-Kareem, mushrikeen-e-Makkah ke is izterab ka naqsha youn kheenchta hai:

⑤ Farman-e-Bari Ta’ala hai:
Zalimon ne baham sargoshiyan keen ki ye to apne jaisa hi ek bashar hai, phir kya wajah hai ki aap aankhon dekhe jadu ke lapete me ajate hain? (Surah-al-Ambiya: 3)

Hafiz Ibne Hajar (rh) (d 852h) farmate hain: “Ye kuffar-e-quraish se khitab hai, jo Muhummad-e-Kareem ﷺ ke Allah ke Rasool hone ko na-mumkin khyal karte the, kyouki Aap ﷺ bashar the”. (Fathul Bari: 10/225)

⑥ Allah Ta’ala ne is Ulat-palat wali nafsiyati kaifiyat ka radd kiya aur farmaya:
(Aye Nabi!) Aap se qabl jitne ambiya Humne bheje aur unki taraf wahy ki, sabhi mard the. Agar aap ko nahin maloom to ahle zikr se poochh lijiye. (Surah-al-Ambiya: 7)

Yahan is maloom haqeeqat ki taraf tawajjo dilai gayi ki pahle ambiya bashar the, to yaqeenan Muhummad ﷺ bhi bashar hi hain.

Allah Rabbul Izzat farmate hain:
Aur aap Allah ke qanoon ko tabdeel hota nahin payenge. (Surah-al-Ahzab: 62)

⑦ Isi tajjub ko ek jagah youn bayan kiya:
Qaf! Qasam hai Qur’an-e-Majeed ki, kuffar ne tajjub kiya ke unke pas unhi me se ek darane wala aya! Phir kahne lage: Ye to ajeeb bat hui. (Surah Qaf: 1-2)

⑧ Doosri jagah farmaya:
Kya logon ko is par tajjub hota hai ki Humne-unme se ek mard ki taraf wahy bhej di? (Surah Yunus: 2)

Mushrikeen hairan hain ke akhir ek insan, ek bashar nubuwwat ka dawedar kyonkar ban gaya?

Ab zara nazre tawajjo ko is pahlu par kheenchiye ke kuffar-e-Makkah ke is tajjub ko khatm karne ki 2 sooraten theen:

❶ Kuffar ke is eteraz ko taslim kiya jaye ke waqai ek bashar nabi nahin ban sakta aur Muhummad ﷺ ki bashariyat se inkar kar diya jaye.
❷ Ya Kuffar ke is etraz ko hi ghalat thehra diya jaye aur batlaya jaye ke bashar bhi nabi ho sakta hai, ya nabi hota hi bashar hai.

Agar ye bataya jata ki bashar bhi nabi ho sakta hai, to isse sabit ho jata ke Nabi-e-Kareem ﷺ bashar hain, bat khatm ho jati.

Aur, agar ye bataya jaye ke Nabi hota hi bashar hai, to goya ye qanoon bata diya gaya ki jo nabi hoga wo bashar hoga. Ab zara Qur’an ki gawahi ka mutala kijiye.

Qur’an aur Bashariyat-e-Nabawi ﷺ

Jab mushrikeen-e-Makkah ne Nabi e Akram ﷺ ke bashar-rasool hone par shak ka izhar kiya to Allah Ta’ala ne unko 2 tarah se samjhaya:

① Pahla:
“(Aye Nabi!) Aap se qabl jitne Ambiya Humne bheje aur unki taraf wahy ki, sabhi mard the, agar aap ko nahin maloom to ahle-zikr se poochh lijiye.” (Surah an Nahl: 43; Surah-al-Ambiya: 7)

② Doosra:
“Jab logon ke pas hidayat aa chuki to unhe us par iman lane se is khyal ne rok diya ki kya Allah ne ek bashar ko Rasool bana kar bheja hai? To Aap unse kah dijiye ki zameen par agar farishte hote to yahan mutmaeen ho kar chalte-phirte, to hum unpar aasman se koi farishta he rasool bana kar nazil karte.”(Surah Bani Israel: 94-95)

Hafiz Ibne Kaseer (rh) (d 774h) is ayat ki tafseer youn karte hain: “Murad ye hai ke farishton ki jins se rasool bhej dete. Aap ﷺ choonki bashar the to Humne apne khas fazal-o-karam se aap ki jins se rasool bhej diya”. (Tafseer Ibne Kaseer: 4/174)

③ Qur’an iski mazeed wazahat karta hai, farmaya: Agar aap ko inkar hai ki Nabi bashar nahin ho sakta, to mere Allah ne mujhe hukm diya hai:
“Kah dijiye ke mere aur tumhare darmiyan Allah ki gawahi kafi hai, wo apne bandon ki khabar rakhne wala aur unhe dekhne wala hai.” (Surah Bani Israel: 96)

Iske bad to koi shak he baqi nahin rahta ke Nabi-e-Kareem ﷺ bashar he the.

④ Phir Allah Ta’ala ne Rasool ﷺ he ki zabani aap ki bashari’at ka elan karwaya:
“Kah dijiye ke main tumhari tarah ka ek bashar hoon, meri taraf wahy ki jati hai.” (Surah-al-Kahf: 110; Surah Ha Meem Sajda: 6)

⑤ Kuffar-e-Makkah ne Rasoolullah ﷺ se kai mo’jizat (miracles) ka mutalaba kiya, to Allah ne farmaya:
“Kah dijiye ke mera Rabb pak hai, main to bas ek bashar rasool hoon.” (Surah Bani Israel: 93)

⑥ Ek maqam par farmaya:
“Yaqeenan tumhare pas tumhari jaanon me se ek rasool aya hai.” (Surah-at-Tauba: 128)

⑦ Mazeed farmaya:
“Jis tarah Humne tumhare andar tumhi me se ek rasool bheja, jo tum par humari ayat tilawat karta hai. “(Surah-at-Tauba: 152)

⑧ Mushrikeen kahne lage ke kisi bashar par koi wahy nazil nahin hui, to Allah ne farmaya:
“Jab kuffar ne kaha ki Allah ne kisi bashar par koi cheez nazil nahin ki, to unhone Allah ki qadr nahin ki, jis tarah ki qadr karne ka haq tha.” (Surah-al-Anam: 91)

Phir unka radd karte hue farmaya:
“Kah dijiye: Phir wo kitab kisne nazil ki thi, jise Musa laye the, jo tamam insano ke liye raushni aur hidayat thi.” (Surah-al-Anam: 91)

Rasoolullah ﷺ Agar Farishta Hote?

Mushrikeen ke mutalaba ke jawab me Allah Ta’ala ne farmaya:
“Agar hum is Nabi ko farishta bana kar bhejte, to bhi insan he ki shakal me bhejte, tab bhi unhe (kuffar) wahi shubha hota jo ke ab hai.” (Surah-al-Anam: 9)

Qur’an Majeed me aisi kai aur ayaten maujood hain jinse mas’la noor-o-bashar ko samajhna intehai aasaan ho jata hai, Qur’an ne har etraz aur har shubah ko hal kar diya hai. Iske maane me kisi qism ka koi ibham (confusion) baqi nahin rakha.

Khyal tha ki koi Nabi, bashar nahin ho sakta. To uske jawab me farmaya gaya ki Nabi hota he bashar hai.

Sawal paida ho sakta tha ki mumkin hai ki baqi ambiya bashar hon, magar Rasoolullah ﷺ noor hon, to farmaya ki Allah ka qanoon tabdeel nahin hota.

Phir khud Rasoolullah ﷺ ki zabani kahlaya ki Aap ﷺ bashar hain. Balki farmaya: Agar wo noor hote to bhi bashar ban kar ate, matlab wazeh hai ke wo noor nahin hain.

Nabi ﷺ Ki Gawahi

① Sayyidna Abu Huraira (RA) bayan karte hain ke maine Rasoolullah ﷺ ko farmate hue suna:
“Allah! Yaqeenan Muhummad bashar hai, ise ek bashar ki tarah ghussa aa jata hai.” (Saheeh Muslim: H# 2601)

② Syeda Umme Salama (RA) bayan karti hain ke Rasoolullah ﷺ ne farmaya:
“Main ek bashar hoon. Aap mere pas muqaddamat late hain, mumkin hai koi apne dawa ke dalaail ko behtar andaz me samjhaane ki salahiyat rakhta ho. ……” (Saheeh Bukhari: H# 7169; Saheeh Muslim: H# 1713)

③ Sayyidna Samurah bin Jundub (RA) bayan karte hain ke Nabi-e-Kareem ﷺ ne Sahaba ke ijtema se khitab karte hue farmaya:
“Logon! Main bashar hoon aur Allah ka Rasool hoon.” (Musnad Ahmad: 1/329-330; Abu Dawood: H# 184; Nasaai: H# 1484; Tirmizi: H# 562 (mukhtasaran)

④ Sayyidna Rafe bin Khadij (RA) bayan karte hain ke Nabi e Akram ﷺ ne farmaya:
“Yaqeenan main bashar hoon, jab main aap ko deen ke mutalliq koi hukm doon, to us par (sakhti se) amal karen aur jab main aap ko apni raay se hukm doon, to main bashar hoon.” (Saheeh Muslim: H# 2362)

⑤ Sayyidna Abu Huraira (RA) bayan karte hain ki Rasoolullah ﷺ ne farmaya:
“Bila-shubah main ek bashar hoon, mumkin hai koi apni dalil ko bayan karne me doosre ki ba-nisbat zaban ka tez ho. …. (Musannaf Ibne Abi Shaiba: 7/234; Musnad Ahmad: 2/232; Ibne Majah: H# 2318; Musnad Abi Ya’la: H# 5920)

⑥ Sayyidna Zaid bin Arqam (RA) bayan karte hain ke Rasoolullah ﷺ ne farmaya:
“Amma bad, logon! Khabardar, yaqeenan main ek bashar hoon, shayad ke jald hi mere Rab ka elchi (farishta) aa jaye aur main uski dawat par labbaik kah doon.” (Saheeh Muslim: H# 2408)

⑦ Sayyidna Abu Huraira (RA) bayan karte hain ki Rasoolullah ﷺ ne farmaya:
“Allah! Yaqeenan main ek bashar hoon. Musalmano me se jisko maine bura-bhala kaha hai ye us par lanat ki hai ya usko kode mare hain, to-un-cheezon ko uske liye pakeezgi ka zariya aur rahmat bana de. (Saheeh Muslim: H# 2601)

⑧ Sayyidna Mahmood bin Labeed (RA) bayan karte hain ki Rasoolullah ﷺ ke bete Ibrahim (RA) ki wafat par Aap ﷺ ki aankhon se aansu bah nikle. Sahaba ne arz kiya: Allah ke Rasool! aap Allah ke Rasool ho kar rote hain? Farmaya: Yaqeenan main ek bashar hi hoon, meri aankhen bah rahi hain. (Tabaqat Ibne Saad: 1/142-142)

Aisi kai aur ahadees hain jinse maloom hota hai ki Rasoolullah ﷺ khud ko bashar he kahte the. Aur insano wali sari khusoosiyaat Aap ﷺ ke andar payi jati thin jaise bhool‐chook hona, gham me aansoo jari hona, andaze me ghalati ka imkan hona, ghussa aa jana, maut aa jana, waghairah.

Sahaba (RA) Ki Gawahi

Is bare me kai sahaba se wazeh alfaz milte hain lekin sirf 8 mashhoor sahaba se he gawahi pesh ki ja rahi hai taki mazmoon lamba na ho jaye.

Sayyidna Abu Bakar Siddiq (RA)

Nabi-e-Kareem ﷺ ek din Khana-e-Kaba me namaz ada kar rahe the ke Uqba bin Abi Mueet Aap ﷺ ki gardan me kapda dal kar aap ka gala dabane laga. Isi mauqe par Abu Bakar (RA) ne aage badh kar Uqba ko kandhe se pakad kar Rasoolullah ﷺ se door kar diya. Phir ye ayat tilawat ki:
“Tum ek aise admi ko qatl karna chahte ho, jo kahta hai ke mera Rabb Allah hai? Aur tumhare pas tumhare Rabb ki taraf se raushan nishaniyan le kar aya hai. (Surah-al-Momin (Ghafir): 28).” (Saheeh Bukhari: H# 4815)

Sayyidna Umar bin Khattab (RA)

Sayyidna Umar bin Khattab (RA) ne farmaya:
Rasool ﷺ aur Abu Bakr (RA) 2 aisi azeem shakhsiyate hain jinki iqteda (ittiba) karna chahiye. (Saheeh Bukhari: H# 7275)

Sayyidna Abu Saeed Khudri (RA)

Sayyidna Abu Saeed Khudri (RA) farmate hain:
Rasoolullah ﷺ he wo bande the (jinhen ikhtiyar diya gaya tha). (Saheeh Bukhari: H# 466; Saheeh Muslim: H# 2382)

Ummul Momineen Syeda Ayesha (RA)

Qasim bin Muhummad ﷺ kahte hain ke Syeda Ayesha (RA) se Nabi-e-Kareem ﷺ ki zindagi ke bare me poochha gaya, to farmaya:
Nabi-e-Kareem ﷺ ek bashar the, apne kapdon se jooen (lice) saf karte, bakriyon ka doodh dohte aur apne kaam khud karte the. (Musnad Ahmad: 6/256; Shamaail Tirmizi: H# 343; Al Adab-al-Mufrad lil Bukhari: H# 541)

Sayyidna Anas bin Malik (RA)

Sayyidna Anas bin Malik (RA) bayan karte hain ke ek dafa hum Nabi-e-Kareem ﷺ ke sath masjid me baithe hue the, ke ek oont-sawar aya, usne oont masjid me bitha diya aur uske ghutne bandh diye aur poochne laga; aap me Muhummad ﷺ kaun hai? Us dauran Nabi-e-Kareem ﷺ humare darmiyan tek lagaye baith the. Hum (Sahaba) ne kaha: Ye safed rangat wale shakhs, jo tek lagaye jalwa-afroz hai. (Saheeh Bukhari: H# 63)

Sahaba (RA) ne Nabi-e-Kareem ﷺ ke liye “الْرَّجُلُ” (admi) ka lafz istemal kiya hai, jo insan ke liye he bola jata hai.

Sayyidna Mugheera bin Shoaba (RA)

Aap (RA) ne Kisra ke tarjuman se kaha:
Zameen aur aasman ke Rabb ne humari taraf humari jins (yani insan) se ek nabi bheja hai, jinke walidain ko hum jante hain. (Saheeh Bukhari: H# 3159)

Sayyidna Abu Zar Ghifari (RA)

Aap (RA) bayan karte hain ke main qabila-e-ghifar ka ek shakhs tha:
Hume ye khabar pahunchi ki Makkah me ek admi ne nubuwwat ka dawa kiya hai. Maine apne bhai (Unais Ghifari) se kaha, aap us admi ke pas jayen aur usse bat-cheet karen aur uske bare me mujhe khabar den. Wo chale gaye aur Aap ﷺ se mulaqat ki, phir wapas aye. Poochha: kya khabar hai? Kahne lage: Allah ki qasam! Maine us admi ko dekha ke khair ka hukm deta aur burai se rokta hai. (Saheeh Bukhari: H# 3522; Saheeh Muslim: H# 2474)

Yahan bhi Sahaba (RA) ne Nabi-e-Kareem ﷺ ke liye “الْرَّجُلُ” (admi) ka lafz istemal kiya hai, jo insan ke liye he bola jata hai.

Sayyidna Bara bin Aazib (RA)

Sayyidna Bara bin Aazib (RA) bayan karte hain:
Rasoolullah ﷺ mard the …(Saheeh Muslim: H# 2337)

Khulasa

Hazraat! Aapke samne Allah, uske Habeeb ﷺ, us habeeb ke jaan-nisar sahaba (RA) sabse yahi bat pata chalti hai ki Nabi ﷺ ke bashar hone me koi shak nahin rah jata.

Ummid hai ki ye article aapko pasand aya hoga. Isse mutalliq koi sawal ho to comment me puchh sakte hain. Jazakallah Khair.

Is mazmoon ka kafi bada hissa Muhaddis Ghulam Mustafa Zaheer (hz) ki kitab ‘Meezanul I’tiqaad’ ke mazmoon ‘Bashariyat-e-Nabawi ﷺ’ (pgs 52-70) se liya gaya hai.