Inkare Hadees: Ek Jaayza

Humare aur sahaba kiram ke beech deen ko smajhne me ek bahut bada farq hai. Jab humse deen ke maakhaz (source) ki  baat ki jati hai to hum pahle Qur’an ko rakhte hain phir ahadees etc ko. Lekin sahaba ke liye wo sirf ek tha; Rasoolullah ﷺ ki zaat. Unse jo bhi mile, Qur’an ya hadees, wo Sahaba ke liye deen tha. Isi buniyadi farq ki wajah se hum me se kuch log is had tak aage badh gaye hain ki wo Qur’an ko to aankh band karke man lete hain lekin jab ahadees ki  baat aati hai to usko apni aql ke taraazu par taulte hain aur jo hadees unke defective mind me nahin aati uska inkar kar dete hain. Kuch log to sire se ahadees ka inkar he kar dete hain.

Is bare me ek hairaankun peshengoi (astonishing prophecy) Allah ke Nabi ﷺ ne 1400 sal pahle he kar di thi. Rasoolullah ﷺ ne farmaya “Bahut jald aisa hoga ki ek admi apne takht par taik lagaye baitha hoga. Usko meri koi hadees sunayi jayegi to wo kahega ki humare aur tumhare beech Allah ki kitab hai. Hume isme jo cheez halaal milegi, use halaal manenge aur jo isme haraam hogi use haraam qaraar denge. Phir aap ﷺ ne farmaya ki “Sun lo! Jo kuch Allah ke Raool ﷺ ne haraam kiya wo usi tarah haraam hai jis tarah Allah ne haraam kiya ho.” (Ibn Maajah h# 12, Tirmizi h# 2664). Isi  baat ko zehan me rakhte hue hum sabse pahle ye samajhne ki koshish karenge ki ahadees bhi Allah ki taraf se he hain.

Kya Allah Ne Jo Kuch Bhi Nazil/Wahee Kiya, Wo Sirf Qur’an Me Hai?

Ye  baat waqai me kafi aham hai. Kya Allah ne jo kuch bhi nazil kiya wo sirf Qur’an me hai ya Qur’an ke alawa bhi kuch nazil kiya? Is point ko hum Qur’an ki kuch aayaat se samajhne ki koshish karenge.

⬤ “Jo darakht tumne (Aye Nabi) kaate aur jo chhor diye, sab Allah ke hukm se tha.” (Qur’an, 59: 5)

➤ Is ayat se pata chala ki khajoor ke ped kaatne ka ye amal Allah ke hukm se hua tha. Lekin Qur’an me aisa koi hukm darkht kaatne se pahle ka nahin milta bali kaatne ke bad ek ittela/information ke taur par bata diya ki aisa Allah ke hukm se he hua tha.

⬤ “Aur is Qible ko jis par aap is waqt hain, HUMNE ISLIYE MUQARRAR kiya tha taki Hum jaan le kaun rasool ki ittiba karta hai.” (Qur’an 2:13)

➤ Is ayat me jis Qible ki baat ho rahi hai wo Baitul Maqdis hai lekin Baitul Maqdis ko Qibla banane ka hukm Qur’an me kahin nahin hai.

⬤ “Bus jab Nabi ne us biwi se is baat ka zikr kiya to biwi ne puchha ki aapko kisne khabar di? Nabi ne jawab diya ki mujhe us Al-‘Aleem aur Al-Khabeer ne khabar di.” (Qur’an 66: 3)

➤ Qur’an majeed me kahin nahin hai ki Allah ne apne Nabi ko ittila di ki tumhari biwi ne tumhara raaz zahir kar diya.

⬤ “Phir agar tum khauf ki halat me ho to tum paidal ya sawari he par namaz padh liya karo. Phir jab tum aman ki halat me ho jao Allah ko usi halat me yad karo (yani namaz padho)  jis tarah usne tumhe wo kuch sikha diya hai jo tum nahin jante the.” (Qur’an 2: 239)

➤ Yahan namaz e khauf ka bayan ho raha hai aur kaha ja raha hai ki jab tum aman ki halat me aa jao to usi tarah namaz padho jis tarah Allah ne sikhaya. Lekin Qur’an me namaz ka tariqa kahin nahin milta.

❖ Upar pesh ki gayi ayaat se ye maloom hua ki Allah ne kisi baat ka hukm diya ya kisi amal ka zikr kiya lekin wo Qur’an me kahin maujood nahin hai. Iska matlab ye hua ki ya to Qur’an ki wo aayaat ghayab ho gayi yani Qur’an mukammal nahin hai (Ma’az Allah), ya Allah ne Nabi ﷺ par Qur’an ke alawa bhi kuch aur nazil kiya.

Allah ne Qur’an Ke Alawa Aur Kya Nazil Kiya?

Is  baat ka jawab bhi hum Qur’an se he lete hain;

⬤ “Aur jo utaari tum par KITAB aur HIKMAT.” (Qur’an 2:231)

⬤ “Aur Allah ne aap par KITAB aur HIKMAT nazil ki.” (Qur’an 4:113)

➤ Yahan dhyan dene wali  baat ye hai ki kitab aur hikmat dono ka alag alag zikr kiya gaya hai. Aur na sirf zikr kiya balki Nabi e kareem ﷺ is kitab ki tarah hikmat ki bhi taleem dete the.

“Aap inko kitab aur hikmat ki taleem dete the.” (Qur’an 2:129)

“Beshak Allah ne momino par ehsan kiya jo inhi me se ek rasool bheja jo inhe uski ayate padh kar sunata hai aur inhe paak karta hai aur inhe kitab aur hikmat sikhata hai.” (Qur’an 3:164)

Aur ye hikmat kya hai? Agar hikmat ka matlab Qur’an he hai to bar bar kitab aur hikmat ko alag alag bayan karne ki kya zarurat thi?

Allah ne ummahatul momineen (Nabi ﷺ ki biwiyan) ko hukm diya ki yad karo Allah ki ayat aur hikmat jo tumhare gharo me tilawat ki jati hai. (Qur’an 33: 34)

Zahir hai yahan par Allah ki AAYAAT ka matlab Qur’an, aur HIKMAT ka matlab Rasoolullah ﷺ ki baate hain. Is tarah Qur’an se sabit hua ki hikmat se murad farman e Rasool ﷺ hai jo Allah ne nazil kiya.

Ahadees Bhi Allah Ne He Nazil Ki Hain

Ji, bilkul. Aur ye  baat hum nahin balki khud Allah ta’ala ne farmayi hai;

⬤ “Woh (Nabi) apni khwahish-e-nafs se nahin bolte. Ye to ek wahee (Inspiration /revelation) hai jo unpar nazil ki jati hai.” (Qur’an 53:3,4)

Yani Nabi ﷺ apni taraf se kuch nahin bolte. Deen ke mamle me unko wahee ke zariye hidayatnama diya jata hai. Iski wazahat is  baat se bhi hoti hai ki Allah ne ek jagah farmaya ki;

⬤ “Humne he ZIKR nazil kiya hai aur Hum he iski hifazat karne wale hain.” (Qur’an 15: 9).

Yahan Allah ne lafz Qur’an nahin balki Zikr istemal kiya, halanki Allah ke paas alfaz ki kami nahin hai. Aur ek jagah khud Rasoolullah ﷺ ke liye bhi zikr lafz ka istemal kiya.

⬤ “Allah ne tumhari taraf ZIKR nazil kar diya hai. Ek aisa rasool jo tumko Allah ki saf saf hidayat dene wali aayaat sunata hai taki iman lane walon aur nek amal karne walon ko andheron (darkness) se nikaal kar roshni me le aaye.” (Qur’an 65: 10, 11)

➤ Yani agar hum upar ki dono ayato ko sath rakh kar dekhe to pata chalega ki Rasoolullah ﷺ se hume jo bhi mila wo wahee (revelation) he hai chahe Qur’an ho ya hadees. Aur sirf yahi nahin, in dono ki hifazat ka zimma bhi khud Allah ne he liya hai. Yahi wajah hai ki sahaba kiram is par dhyan nahin dete the ki ye  baat Qur’an ki hai ya hadees ki. Bus agar Nabi ﷺ se mil rahi hai to wo qabil-e-hujjat aur qabil-e-amal hai.

Yahan ek aham  baat ye hai ki sahaba kiram ne bhi Qur’an aur ahadees ke hukm ko wahee-e-ilahi mana. Is bare me sirf 2 examples dekh lijiye;

1) Ek aurat Abdullah Ibn Masood (RA) ke paas ayi aur puchha ki aap kahte hain ki Allah ne jism godne aur gudwane (tattoo banaane aur banwane walo) par laanat farmayi hai. Ibn Masood (RA) ne kaha ‘Haan’. To wo aurat kahne lagi ki maine shuru se akhir tak Qur’an padha lekin mujhe aisa kahin nahin mila. Tab aapne farmaya ki ‘agar tumne Qur’an theekse padha hota to usme zarur pati. Kya tumne ye ayat nahin padhi “Jo mere rasool de wo le lo aur jisse mana kare usse ruk jao” (Qur’an 59:7)’. Us aurat ne kaha ‘Haan’. To Ibn Masood (RA) ne kaha ki ‘Maine Rasoolullah ﷺ ko ye laanat karte hue suna hai’. (Bukhari h# 4886)

➤ Is waqye me Abdullah Ibn Masood (RA) ne Nabi ﷺ ki laanat ko Allah ki lanat kaha aur ye kisi ghalat fahmi ki wajah se nahin hua balki wo ye jante aur mante the ki agar Nabi ﷺ ne koi  baat kahi hai to wo apni taraf se nahin kahi balki Allah ki taraf se wahee ke zariye hidayat milne ke bad he kahi hai.

2) Isi tarah Abu Huraira (RA) farmate hain ki log kahte hain ki mai itni ahadees bayan karta hoon. Main kahta hoon ki agar Qur’an me 2 ayaat na hoti to mai koi hadees bayan na karta. “Jo log humare hukmo aur hidayato ko, jo humne nazil ki hain, chhupate hain…….akhir tak ”(Qur’an 2: 159,160) (Bukhari h# 118)

➤ Is riwayat se pata chala ki Abu Huraira (RA) ahadees ko bhi Allah ki taraf se nazil kiya hua mante the aur nazil ki gayi hidayat ko chhupane ke azab ke dar se itni ahadees bayan karte the.

Hadees Ka Hukm Bhi Allah Ke Hukm Ki Haisiyat Rakhta Hai

“Un logo se lado jo Allah par aur qiyamat par iman nahin late. Jo Allah aur uske Rasool ki haraam ki gayi cheez ko haraam nahin jante”. (Qur’an 9:29)

Is ayat me Rasool ﷺ ki haraam ki gayi cheez ko haraam na janne walo ke khilaf Allah ne jung ka elan kiya hai aur ye hum sab jante hain ki Rasool ki haraam ki gayi cheeze hume ahadees me he milengi. Kuch aisi he  baat hume hadees me bhi milti hai.

Miqdam (RA) ka bayan hai ki Nabi ﷺ ne farmaya “Jo Allah ke rasool ne haraam kiya wo dar haqeeqat aisa he hai jaisa Allah ne haraam kiya hai.” (Ibn Maaja H# 12, Tirmizi H# 2664)

Khulasa

Inkar-e-Hadees:

• na Quran se sabit hota hai
• na Sahaba ke amal se
• na Rasool ﷺ ki taleem se

Qur’an, Rasool ﷺ ko:

• Ita’at ka mustahiq
• Qur’an ka sharah karne wala
• Chizon ko Halal aur Haram karne aur unko bayan karne wala
• Qanooni faisla karne wala
• Aur amali namoona qarar deta hai

Isliye Saheeh Hadees ka inkar, haqeeqat me Qur’an ke hukm ka